ئةخمةت ئابلصمصت

ئەلگە تونۇلغان ئاتاقلىق درامما ۋە كىنو ئارتىسى ئەخمەت ئابلىمىت 1958 - يىلى غۇلجا شەھىرىدە تۇغۇلغان . ئۇ سەنئەتتىكى تەبىئىي تالانتى بىلەن 1976 - يىلى 2 - ئايدا شىنجاڭ ئوپېرا ئۆمىكىگە قوبۇل قىلىندى . شۇنىڭدىن ئېتىبارەن ئەخمەت ئابلىمىت چوڭقۇر ئېتىقاد ۋە ئۇلۇغۋار ئىرادا بىلەن كەسىپكە بېرىلىپ ئاز بولمىغان مۇۋەپپەقىيەتلەرنى قولغا كەلتۈردى . ئەخمەت ئابلىمىت ئىلگىرى - كېيىن بولۇپ ، « گۈلنىسا » دارمىسىدا قادىر ، « چىن مودەن » درامىسىدا مەردان ، « سىز بىزگە ئىشىنەمسىز » درامىسىدا خالىق ، « غېرىپ سەنەم » درامىسىدا شاھى ئابباس ، « ئاماننىساخان » درامىسىدا قېدىرخان ، « سىرتماق » دارمىسىدا ھېمىت قاتارلىق خىلمۇ خىل كەچۈرمىش ۋە خاراكتېرىگە ئىگە پېرسوناژلارنىڭ ئوبرازىنى ئاجايىپ ئۇستىلىق بىلەن يورۇتۇپ ، تاماشىبىنلار ئارىسىدا زور تەسىر قوزغاپ ئۇلارنىڭ قەلبىدىن چوڭقۇر ئورۇن ئالدى ۋە كۆپ قېتىم ئورۇنداش مۇكاپاتىغا ئېرىشتى . ئەخمەت ئابلىمىت يەنە 1991 - يىلى ئىشلەنگەن « موللازەيدىن » ناملىق ھېكايە فىلىمىدە باش رول - موللا زەيدىننىڭ رولىنى ئېلىپ ، ئۇنىڭ يۇمۇرلۇق ، ھەزىلكەش خاراكتېرىنى ناھايىتى ياخشى ئېچىپ بەردى . بۇنىڭدىن باشقا ئەخمەت ئابلىمىت « قۇربان تۇلۇمنىڭ بېيجىڭغا سەپىرى » ناملىق كىنو فىلىم ۋە « كۈتۈلمىگەن توي » ، «تىمتاس گۇگۇم »، « ئاخىرقى كۆل » ، « بۇ چۈش ئەمەس » ، « ساراڭ » ، « چىن سۆيگۈ » قاتارلىق تېلېۋىزىيە تىياتىرلىرىدىمۇ ئوخشىمىغان پېرسوناژلارنىڭ ئوبرازىنى ناھايىتى جانلىق ۋە تەسىرلىك يارىتىپ تاماشىبىلارنىڭ ۋە كەسىپداشلىرىنىڭ يۈكسەك باھاسىغا ئېرىشتى . ئۇ ئورۇنداشقا قاتناشقان « چولپانخومار » ، « سالام خەت » ، « ئىمتىھان»، «كۈندە ئايەم » قاتارلىق ئىپىزورتلار ئەخمەت ئابلىمىتنىڭ كۆپكە ماھىر ھەقىقىي بىر سەنئەتكار ئىكەنلىكىنى تېىخمۇ چوڭقۇر ئىسپاتلايدۇ .