ئانىكام چۆچۈرە ئويۇنى

ئورنى Wikipedia
Jump to navigation Jump to search

بۇ ئۇيغۇر ياشلىرى ۋە ئۆسمۈرلىرى قىزىقىپ ئوينايدىغان ئەنئەنىۋى ئويۇنلارنىڭ بىرى بولۇپ، بۇ ئويۇننى پەسىل تاللىماي دائىم ئويناشقا بولىدۇ. بۇ ئويۇننى ئوينىغۇچىلار بىر يەرگە جەم بولۇپ بىرەيلەننى <ئانا> سايلايدۇ. ئويۇنغا قاتناشقان بالىلار ئۆز ئارا قول تۇتۇشۇپ بىر چەمبەر ھاسىل قىلىدۇ - دە، ئانىنى قاق ئوتتۇرىغا ئېلىپ چۆرگىلەيدۇ. <ئانا> دۈگىلەك ئوتتۇرىسىدا زوڭ ئولتۇرۇپ <چۆچۈرە> ئېتىش ھەرىكىتىنى دورايدۇ. بۇ ۋاقىتتا، <ئانا> ئەتراپىدا دۈگىلەك بولۇپ ئايلىنىۋاتقان بالىلار: ئانىكام چۆچۈرە، ئانىكام چۆچۈرە. بىزنىڭ قازاندا، چۆچۈرە قاينايدۇ. ئانىكام بەرمەيدۇ، بەرمىسە بەرمىسۇن. كۆزىمىز كۆرمىسۇن. ئىشىكنى تاقاپ يېسۇن، ئاق ئۆيدە ئايىم بار، پىيالىدە چايىم بار. ئاش بەرسە سۇيۇق بەردى، نان بەرسە كۆيۈك بەردى. تويمۇدۇم دېسەم، تىل دەشنام بەردى. قانداق قىلاي ئاللا، ئۆگەي ئانىنىڭ دەردى. ئانا دېسەم ئاقىدۇ ياشىم، ئاتا دېسەم ئاقىدۇ ياشىم. مەن قالدىم يېتىم، قېنى سىلەر قېرىندىشىم. ... ... ... دەپ قوشاق توقۇشىدۇ ۋە گۈررىدە ئانىنىڭ قېشىغا كېلىپ: - ئانىكا چۆچۈرە پىشتىمۇ؟ - دەپ توۋلايدۇ. - ياق پىشمىدى. بىردەم تۇرۇپ كېلىڭلار، - دەپ جاۋاپ بېرىدۇ ئانا. بالىلار دەرھال ئۆز ئورنىغا بېرىپ دۈگىلەك بولۇپ بايىقى قوشاقنى يەنە بىر قېتىم تەكرار ئوقۇپ ئاندىن <ئانىكا چۆچۈرە پىشتىمۇ؟> دەپ قايتا سورايدۇ. ئانا: - پىشتى، قولۇڭلارنى يۇيۇپ كېلڭلار، مەن قاچا - قۇچا تەييارلىۋالاي، - دەيدۇ. بالىلار كەتكەندىن كېيىن <ئانا> چۆچۈرىنىڭ ھەممىسىنى <يېۋالىدۇ>. ئانا بىردەمدىن كېيىن قاچا ئېلىپ كېلىپ بالىلارنى قوغلايدۇ. بالىلار قاچىدۇ. ئانا قوغلاپ تۇتۇۋالغىنىدىن <سەن قانچە چۆچۈرە يېدىڭ؟> دەپ سورايدۇ. شۇنداق قىلىپ، بالىلارنىڭ ئىچىدىن چۆچۈرىنى ئەڭ كۆپ يېگىنىنى تېپىپ <ئانا> قىلىپ ئويۇنىنى قايتىدىن باشلايدۇ. بۇ ئويۇن ئارقىلىق بالىلار ئۆز ئاتا - ئانىسىنىڭ قەدىرىگە يېتىشنىڭ لازىملىقىنى تونۇپ يېتىدۇ ۋە ئەدەپ - ئەخلاقلىق بولۇشقا ئادەتلىنىدۇ."[1]

مەنبەلەر[تەھرىرلەش]